Премиерот на Косово, Авдулах Хоти, денеска им порача на членовите на Комисијата за надворешни работи на Европскиот парламент дека договорот постигнат во Вашингтон го надополнува тековниот дијалог во Брисел, под покровителство на ЕУ. Тој напомена дека целосно ќе го почитува договорот за Заедницата на српски општини (ЗСО).
„Во текот на минатата недела постигнавме договор во Вашингтон, на кој работиме веќе некое време, и тоа е голем чекор кон сеопфатен договор со Србија. Ние го нарекуваме договор за економска нормализација, бидејќи тој главно се занимава со економски прашања. Мислам дека договорот го надополнува дијалогот што се одржува во Брисел“, рече Хоти.
Премиерот исто така рече дека Косово ќе го почитува договорот за ЗСО.
„На последната рунда разговори со Србија во Брисел беа отворени две главни прашања: прашањето на Заедницата на општини со српско мнозинство и финансиските побарувања меѓу двете земји. Потпишавме договор за таа заедница во 2015 година и не се обидуваме да избегаме од тој договор на кој било начин, ние целосно ќе го почитуваме“, посочи тој.
Хоти, исто така, им порача на европратениците дека се надева дека за време на сегашното германско претседателство со ЕУ, ќе биде одобрена либерализацијата на визниот режим на ЕУ со Косово.
„Непотребно е да се каже, ние сме единствената земја во регионот без либерализација. Познато е дека ги исполнивме сите критериуми и нашата влада се обидува да обезбеди овие критериуми да бидат исполнети и да напредуваат во секое време. Заслужуваме визна либерализација и сакам да им се заблагодарам на европратениците за поддршката“, рече тој.
Тој ги потсети европратениците дека поради барањата на ЕУ, донел некои „крајно непопуларни“ одлуки на почетокот на неговиот мандат – отстранување на даноците и „реципроцитетот“ воведени од претходната влада кон Србија.
„Партнерите од ЕУ тоа го побараа од нас. Ние сме вклучени во овој процес уште од самитот во Париз, каде што ние како Влада ги презентиравме принципите за тоа како го гледаме овој важен процес. Во дијалогот со Србија, постигнавме напредок за повеќе прашања“, рече тој.
„Кога го започнавме овој процес, јасно ставивме до знаење дека се стремиме кон сеопфатен договор за целосна нормализација со Србија и тој може да се постигне само преку заемно признавање“, рече косовскиот премиер.
Тој на Твитер напиша дека имал многу добра средба со претседателот на Европскиот парламент, Давид Сасоли, за управувањето со пандемијата и процесот на визната либерализација.