Премиерот на Косово, Авдулах Хоти, изјави дека лобирањето за меѓународно признавање на Косово не е суспендирано и дека се согласил да соработува со меѓународните партнери за членството на Косово во меѓународни организации.
„Нема прекин на нашите активности, ние се согласивме со нашите партнери дека нашето членство во меѓународни организации ќе се работи заедно со нив, заедно со нашите меѓународни партнери. Тоа е точно“, рече тој во Собранието на Косово во Приштина, пренесе Коха диторе.
Хоти додаде дека замениците министри, неговите заменици и советници затоа биле во Брисел со него минатата недела, на разговори со српската делегација и претставници на меѓународната заедница.
„Јас се координирам со претседателот [Косово Хашим Тачи] и Собранието во процесот на дијалог [со Србија]. Собранието сте вие, пратениците. Ако речете така, ќе се откажам од дијалогот. Дајте предлог за платформа за тоа како да се однесуваме во дијалогот, и јас ќе го почитувам. За мене, Уставот на [Косово] е платформа, ништо друго“, рече Хоти.