Косовскиот премиер Авдулах Хоти на прес-конференција посветена на Извештајот на Европската комисија за напредокот на Западен Балкан рече дека ништо од дијалогот нема да се спроведе без постигнување конечен договор со Белград.
Хоти рече дека косовската влада нема причина да го попречува процесот на дијалог. Според него, нема друго решение освен признавање и постигнување конечен договор, пренесе „Лајми“.
„Оваа влада не се плаши да пристапи кон дијалогот како и другите. Ние ќе седнеме на маса, бидејќи принципите се јасни и договорени во земјата, но исто така се согласивме и со нашите меѓународни пријатели. Тргнуваме од фактот дека не постои друг начин за решавање на отворените прашања освен со дијалог. Дури и да бидат потребни една, две или дури пет години, ќе водиме дијалог додека не стигнеме до финалето за меѓусебно признавање на постојните граници. Нема друго решение“, рече Хоти.
Премиерот на Косово додаде дека не се плаши да пристапува кон сите теми во дијалогот, бидејќи, како што додаде, Владата има јасни принципи.
„Имаме дијалог на рамноправно ниво како две соседни земји кои не се познаваат едни со други. И врз основа на тоа, мислам дека сите треба да го поддржиме овој важен процес. Кога велам дека темата на ЗСО е затворена, мислам дека тоа е договор од 2013 година ратификуван во косовското собрание и тоа е уште еден принцип од 2015 година и тоа е мислењето на Уставниот суд. Од оваа гледна точка, оваа тема е затворена, но тоа е обврска на државата Косово и ние ќе ја почитуваме“, рече Хоти.
Но, додаде тој, се применуваат принципите во процесот на дијалог и „ништо не започнува да се спроведува се додека не се постигне конечен договор со заемно признавање“.
„Бидејќи не го поставивме процесот на дијалог како привремено решение, туку како конечно решение што го затвора еднаш засекогаш, ги нормализира односите меѓу двете земји засекогаш“, нагласи Хоти.