Амбасадорот на Соединетите Американски Држави во Приштина, Џефри Ховениер денеска изјави дека САД во овој момент не можат да кажат кој стои зад нападот на каналот Ибар-Лепенац бидејќи, како што наведе, прерано е и нагласи дека е потребна внимателна истрага.
Како што пренесува порталот „Репортери“, Ховениер по средбата на амбасадорот на Квинта во Приштина со премиерот на Косово, Албин Курти, истакнал дека е потребна темелна и внимателна истрага за да се идентификуваат одговорните за нападот. Тој повтори дека САД силно го осудуваат овој напад врз критичната инфраструктура и поддржуваат целосна истрага.
„Ние им понудивме целосна поддршка на косовските власти во оваа истрага. Веруваме дека е важно одговорните да бидат идентификувани и повикани на одговорност. Овие насилни дејствија се неоправдани“, рече американскиот амбасадор.
На прашањето дали Србија може да биде одговорна за нападот, тој одговори дека е рано да се знае кој е одговорен.
„Во овој момент, САД не можат да кажат кој стои зад нападот. Сè уште е рано и овие работи бараат внимателна истрага. Она што можам да кажам е дека институциите на Косово ја имаат нашата поддршка. Исто така, не сум во можност да исклучам која било група, држава или што било друго, сè уште е рано, сè уште не знаеме“, рече тој.
Веднаш по експлозијата во петокот Курти, без никакви докази, го обвини Белград дека стои зад нападот.
Претседателот на Србија, Александар Вучиќ, вчера во обраќање до јавноста рече дека Курти ги обвини Белград и Србија за експлозијата во првиот бран и посочи дека Белград и Србија немаат поим за тоа и дека истрагата ќе покаже кој може да биде сторителот.