Ракот на бубрег е малигна болест која се развива кога клетките во бубрезите почнуваат да растат неконтролирано, најчесто во делот што ја филтрира крвта и произведува урина. Проблемот е што во раните фази, честопати не покажува јасни симптоми, па дијагнозата се поставува доцна. Затоа препознавањето на раните знаци и информирањето на јавноста стануваат клучни за навремено лекување и подобри исходи.
На кои симптоми треба да обрнете внимание?
Малколм Пакер, извршен директор на Kidney Cancer UK, го предупредува HuffPost дека ова е еден од најбрзо растечките видови на рак, но и еден од најмалку препознаените. Затоа, тој ги истакнува симптомите што никогаш не треба да ги игнорираме:
Крв во урина (дури и еднаш)
Најчест и најран знак на болеста. Може да се види како розова, црвена или кафеава нијанса на урината – дури и ако е многу суптилна, секогаш треба да побарате лекарска помош.
Постојана болка во страната или долниот дел од грбот
Тапа или постојана болка на страната од телото, под ребрата, без очигледна причина може да укажува на проблем со бубрезите.
Оток или грутка во страничниот дел
Цврст израсток што може да се почувствува или види за време на физички преглед често е знак на тумор. Ако забележите дека расте, важно е да дејствувате брзо.
Необјаснето губење на тежина
Кога нагло губите тежина без очигледна причина, особено ако тоа се јавува со други симптоми, вреди да се обрне внимание.