Илјадници научници ги повторија апелите за итна акција за решавање на климатската криза, предупредувајќи дека неколку пресвртни точки сега се неизбежни.
Истражувачите, дел од група од 14.000 научници кои потпишаа иницијатива за прогласување на глобална климатска вонредна состојба, во написот објавен во магазинот „BioScience“ велат дека властите не го решиле проблемот со „експлоатација на Земјата“, кој тие го опишаа како главната причина за кризата.
Тие велат дека од сличната проценка во 2019 година до денес, има „невиден пораст“ на катастрофи поврзани со климата, како што се поплави во Јужна Америка и Југоисточна Азија, евидентирани горештини и пожари во Австралија и САД и разорни циклони во Африка и Јужна Азија.
Студијата наведува „витални знаци“ за мерење на здравјето на планетата, вклучувајќи уништување на шумите, емисии на стакленички гасови и топење на глечерите … Од 31 знак, тие откриле дека 18 од нив се во рекордни вредности.
На пример, и покрај намалувањето на загадувањето како резултат на пандемијата Ковид-19, количината на атмосферски CO2 и метан оваа година е на рекордни нивоа.
Гренланд и Антарктикот неодамна покажаа рекордно ниски бројки на маса на мраз и глечерите се топат 31 отсто побрзо отколку пред 15 години. Топлината на океанот и глобалното ниво на морето се на рекордно ниво од 2019 година, а годишната загуба на бразилскиот Амазон минатата година достигна рекорд во последните 12 години.
Шест области
Истражителите велат дека деградацијата на шумите како резултат на пожар, суша и сеча е претворање на бразилскиот Амазон во извор на јаглерод, наместо како место за апсорпција на тој гас од атмосферата. Рекордни количини на стока (четири милијарди крави и овци) исто така се евидентирани, што е маса поголема од комбинираната маса на сите луѓе и диви копнени цицачи, се наведува.
Авторите на студијата посочуваат дека „има сè повеќе докази дека сме блиски или сме преминале“ неколку пресвртни точки. Една од нив е топењето на ледените плочи на Гренланд и Западен Антарктик, кое сега е можеби неповратно на вековно растојание, и покрај намалувањето на штетните емисии на гас.
Тие, како и досега, повикуваат на промени во шест области: елиминирање на фосилни горива, намалување на загадувачите, обновување на екосистемите, промена на диета од растителна основа, напуштање на моделот на неограничен раст и стабилизирање на бројот на луѓе на планетата.