На 25 јануари ќе се одржи првата заедничката седница на владите на Северна Македонија и Бугарија.
Владата ги формираше работоте групи за продлабочување на билатералната соработка со Бугарија, што како заклучок беше произлезен од состаноците за време на официјалната посета на делегацијата на бугарската Влада на нашата земја.
Работна група за економија, ќе ја предводи Фатмир Битиќи, вицепремиер задолжен за економски прашања. Министерот за транспорт ќе ја предвоси работната група за инфраструктура, транспорт и поврзување. Со заедничката меѓувладина работна група за европска интеграција и зелени политики за копретседавач е назначен Бојан Маричиќ, вицепремиер за европски прашања. Со работната група за култура ќе претседава Артан Груби, прв вицепремиер.
Премиерот Димитар Ковачевски синоќа во интервју за Канал 5 нагласи дека целта на Владата е во работните групи, чијашто работата ќе се одвива практично на неделно ниво, да не бидат вклучени само политичари, туку и деловните заедници, стопанските комори и претставници на универзитетите и на младински организации, кои што можат да дадат придонес во зајакнувањето на добрососедските односни.
Тој потенцираше дека средбата со Петков во Скопје минала во позитивен дух и оти се разговарало за враќањето на довербата, на начин што ќе се вклучат поголем број институции и чинители од општеството кои ќе може да придонесат во тој процес, како и за реализација на проекти коишто се вредни за иднината и за животниот стандард на граѓаните.
– Јас се надевам дека во јуни и јули ќе имаме многу подобри односи со Бугарија и дека ќе бидеме чекор до решавање на отворените прашања што ги имаме, истакна Ковачевски, нагласувајќи дека иако не сака да се врзува со датуми и конкретни рокови, сепак е рационален оптимист којшто верува во остварување на целта – да стигнеме брзо до решение.
Бугарскиот премиер Петков, кој во вторникот престојуваше во посета на Скопје, во коментар на односите на Бугарија со земјава, истакна дека нема да се губи ниту минута за да се претворат новите заложби во вистински резултати, најавувајќи изработка на план со реални достигнувања што треба да се постигнат во следните шест месеци.
– Имаме можност да направиме нешто што не е направено во последните 30 години, изјави Петков, посочувајќи ги како примери транспортното поврзување меѓу двете земји, потребата од воспоставување брза железничка врска меѓу Софија и Скопје, како и директна авиолинија меѓу двата главни града.