Инфективна демантира: Во модуларната болница нема никаква хаварија

од Nikola Popovski

Клиниката за инфективни болести и фебрилни состојби (КИБФС) вечерва реагираше на информациите објавени на една телевизија дека во модуларната болница во склоп на Клиниката е избегната хаварија, со електричната енергија поради прокиснување на покривот.

Според нив, во модуларната болница немало никаква хаварија, бидејќи ниту се случила поплава во болницата, ниту вода била во допир со струјата. На едно место, како што додадоа, се појавило мало количество на водени капки, но во ниту еден миг не биле во допир со електричната енергија.

– Модуларната болница која е помошно инфективно одделение на КИБФС од пуштањето во употреба трипати беше отворана и затворана согласно потребите за третирање пациенти. Во еден период во модуларната болница се одвиваше и вакцинација на здравствените работници, посочија од КИБФС.

На КИБФС вкупно се хоспитализирани 87 пациенти. Капацитетот на Клиниката е 100 болнички кревети, а на модуларната болница кое е помошно инфективно одделение 70 болнички легла. Инфективна клиника ја става во употреба модуларната болница кога е исполнет капацитетот на Клиниката и другите ковид болници во градот. Во последниот период доволниот број на слободни места овозможи затварање на модуларната болница. Модуларната болница во моментов се дезинфицира и се спроведуваат стандардни процедури за нејзино одржување.

Доктор Ненад Лазаров на Фејсбук напиша статус во кој вели дека модуларната болница во Скопје е затворена.

Тој додава дека истата прокиснала, а водата стигнала до струјата.

„Затворена модуларната „болница“ до Инфективна, прокиснала и стигнала вода до струја“, стои во неговата објава.

Слични содржини