Холандскиот тинејџер кој оваа недела стана најмладиот патник во вселената во светот го изненади милијардерот Џеф Безос велејќи му за време на летот дека никогаш не порачал ништо преку Амазон.
Оливер Димен, 18-годишен студент по физика, ги придружуваше Безос, неговиот брат Марк Безос и 82-годишниот Вели Фанк, најстарата личност што леташе во вселената, на 10-минутно патување надвор од атмосферата на Земјата.
„Му кажав на Џеф дека никогаш не сум купил ништо преку Амазон“, изјави Димен за „Ројтерс“ во интервју на аеродромот Шипхол во Амстердам во петокот. Тој со изненадување одговорил дека веќе долго време не чул некој да го каже тоа.
Димен, кој беше избран откако друг кандидат кој плати 28 милиони долари мораше да се откаже, дознал дека ќе се приклучи на летот додека бил на семеен одмор во Италија.
– Тие се јавија и прашаа: „Дали сè уште си заинтересиран?“. Јас одговорив: „Да! Да! Да!“.
На прашањето како е да се патува со ракета со милијардер, тој одговорил со широка насмевка: „Беа супер забавни и сите беа цврсто на земја, колку и да звучи смешно“.