Новата анализа за растот на ракот откри „речиси бесконечна“ способност на туморите да растат и преживеат, наведоа научници, а пренесува Би-Би-Си.
Резултатите од деветгодишното следење на ракот на белите дробови го „изненадија“ и „запрепастија“ научниот тим, кој доби увид во огромната сила против која се бори.
Тие заклучија дека треба да се посвети поголемо внимание на превенцијата и дека е малку веројатен лек „една величина за сите“. Cancer Research UK вели дека раното откривање на ракот е од витално значење.
Најдлабока анализа досега за развојот на ракот и причините за неговото ширење
Студијата наречена TracerX дава најдлабока анализа за тоа како се развива ракот и што предизвикува негово ширење. Раковите се менуваат и еволуираат со текот на времето – тие не се фиксни и непроменливи. Тие можат да станат поагресивни: подобро го избегнуваат имунолошкиот систем и уште подобро се шират низ телото, пишува Nature Medicine.
Туморот започнува како една оштетена клетка, но станува мешавина од милиони клетки кои мутирале на малку поинаков начин. TracerX ја следеше таа разновидност и како таа се менува со текот на времето кај пациентите со рак на белите дробови.
Студија без преседан
„Тоа никогаш досега не е направено во ваков обем“, вели професорот Чарлс Свантон од Институтот Френсис Крик и Универзитетскиот колеџ во Лондон. На повеќе од 400 луѓе – лекувани во 13 болници во Обединетото Кралство – им била направена биопсија на различни делови од ракот на белите дробови додека болеста напредувала.
„Бев изненаден колку туморите можат да бидат прилагодливи“, изјави професорот Свантон за Би-Би-Си, додавајќи: „Не сакам да звучам премногу депресивно во врска со ова, но мислам – со оглед на речиси бесконечните можности во кои туморот може да има многу голем број клетки кои еволуираат во доцната фаза на туморот, што може да биде неколку стотици милијарди клетки – дека постигнувањето излекување кај сите пациенти во доцната фаза на болеста е тешка задача“.
„Нема да можеме да создадеме универзални лекови“
„Мислам дека нема да можеме да создадеме универзални лекови“, рече Свантон, додавајќи: „Ако сакаме да имаме најголемо влијание, мора да се фокусираме на превенција, рано откривање и рано откривање на релапс“.
Дебелината, пушењето, алкохолот и лошата исхрана го зголемуваат ризикот од некои видови рак.
Еволутивната анализа беше објавена во седум одделни студии во списанијата Nature и Nature Medicine.