Поради глобалното затоплување и ерозијата на плажите, Италија би можела да загуби околу 1.000 километри крајбрежје до 2100 година, покажале неодамнешните студии.
Студијата на Заедничкиот истражувачки центар на Европската комисија, објавена на веб-страницата Stopglobalwarming.eu, зборува за можно сценарио во следните 80 години, што покажува дека околу 600 локации на Апенинскиот полуостров се изложени на ризик од ерозија, пренесуваат италијанските медиуми.
Ричионе на брегот на регионот Емилија-Ромања може да се повлече за 128 метри, а Остија во Лацио може да изгуби 125 метри.
Француската ривиера е исто така загрозена
Рекордни 737 метри би можеле да исчезнат во областа Аријано нел Полесине во Венето, додека Сардинија кај Сан Теодоро може да изгуби 642 метри.
Не е утеха за Италијанците, но овој проблем ги погодува сите земји што имаат излез на море.
Франција е меѓу првите 100 земји кои се под најголем ризик, а на списокот е познатото Сен Тропе на француската ривиера.
Студијата опфаќа фактори како што се глобалното затоплување, вештачките пречки на водниот пат и зголемувањето на нивото на морето.