Италија одобри нов пакет помош во вредност од 17 милијарди евра за заштита на компаниите и семејствата од зголемувањето на трошоците за енергија и зголемувањето на цените на храната, пишува Ројтерс.
Еден од последните значајни потези на премиерот во заминување Марио Драги пред изборите следниот месец, следи по веќе постоечката финансиска помош од 35 милијарди евра, буџетирана од јануари за да се ублажи влијанието на огромните трошоци за струја, гас и гориво.
„Овој пакет има за цел да го заштити економското закрепнување на Италија во услови на влошување на меѓународната средина“, рече Драги пред новинарите.
„Подготвени сме да донесеме нови мерки доколку е потребно“, додаде тој.
Како дел од пакетот, официјален Рим ги продолжи до четвртиот квартал од оваа година постоечките мерки насочени кон намалување на сметките за струја и гас за семејствата со ниски приходи, како и намалување на таканаречените „системски трошоци“.