Амбасадата на Соединетите Американски Држави во Сирија издаде предупредување до сите американски граѓани да ја напуштат земјата веднаш поради „зголемената можност за напади“ за време на празникот Рамазан Бајрам, кој кон крајот на март го означува завршувањето на Рамазан во муслиманскиот свет.
Амбасадата објави предупредување на својата официјална веб-страница во петокот навечер, во кое се наведува дека потенцијални цели би можеле да бидат „амбасадите, меѓународните организации и јавните институции на Сирија“ во главниот град Дамаск.
„Методите на напад може или не вклучуваат поединечни напаѓачи, вооружени напаѓачи или употреба на експлозивни направи. Напуштете ја Сирија веднаш“, додаваат од амбасадата.
Американскиот Стејт департмент во моментов има тревога за патување во Сирија на четврто ниво – највисоко ниво на тревога, што значи дека на американските граѓани им се советува да не патуваат во Сирија под никакви околности.
„Ова предупредување останува на сила поради значителните ризици од тероризам, граѓански немири, киднапирања, земање заложници, вооружени конфликти и произволно притворање“, се вели во соопштението на амбасадата.
Американската амбасада во Дамаск ја прекина својата работа во 2012 година, набргу по избувнувањето на граѓанската војна меѓу режимот на поранешниот претседател Башар ал Асад и разни бунтовнички групи.
Асад беше соборен кон крајот на минатата година од коалицијата на опозициските сили предводена од исламистичката група Хајат Тахрир ал-Шам (ХТС). Водачот на ХТС, Ахмед ал Шара, моментално ја извршува функцијата привремен претседател на Сирија.
„Владата на САД не е во состојба да обезбеди рутински или итни конзуларни услуги за американските граѓани во Сирија“, се вели во соопштението. „Чешка делува како заштитна сила за американските интереси во Сирија“.
„Американските граѓани во Сирија на кои им е потребна итна помош треба да се јават во Секторот за интереси на САД во Амбасадата на Чешката Република“, додаде амбасадата.