Амбасадорот на ИЗРАЕЛ во Обединетите нации, Гилад Ердан, луто реагираше на денешната изјава на генералниот секретар на ОН Антонио Гутереш и уште еднаш го повика да поднесе оставка.
„За ОН е срамно што генералниот секретар не ги повлекува своите зборови и не може ниту да се извини за она што го кажа вчера. Тој мора да поднесе оставка“, рече Ердан. Велејќи дека „ја искривува реалноста“, Ердан го обвини шефот на ОН дека го обвини Израел за бруталниот напад на Хамас на 7 октомври.
„Секој човек многу добро разбира дека значењето на неговите зборови е дека Израел е виновен за постапките на Хамас или, во најмала рака, го покажува неговото разбирање за „заднината“ што доведе до масакрот. „Генерален секретар кој не разбира дека убивањето на невините никогаш не може да се разбере преку каква било „заднина“ не може да биде генерален секретар“, додаде тој.
Да потсетиме, генералниот секретар на ОН, Антонио Гутереш вчера во Њујорк, во обраќањето пред Советот за безбедност на ОН, рече дека „нападот на Хамас не се случил во вакуум“ и дека Палестинците живеат под окупација повеќе од 50 години.
Тој исто така рече дека ниту една палестинска жалба против односот на Израел не може да го оправда нападот на Хамас врз цивилите, исто како што нападот на Хамас не може да го оправда израелското убиство на цивили во Газа.