Пожарите се под контрола, но тоа не треба да не опушти. Мора да бидеме будни бидејќи опасноста се уште постои. Доволно е само мало невнимание, изјавил денес техничкиот премиер на Бугарија, Стефан Јанев, одговарајќи на новинарско прашање.
Во врска со дел од критиките зошто Бугарија испратила пожарникари и противпожарна опрема во Македонија, Јанев прокоментирал:
„Намерно донесовме одлука и испративме екипи од нашата противпожарна единица во РС Македонија, бидејќи нашата анализа покажа дека пожарот може да се префрли и на нашата територија, што е факт, бидејќи моментално е на 4 километри од границата. Ако некој се сомнева во тоа, нека ги праша жителите на Благоевград и соседните села колку чад дишеле вчера и како се чувствуваат. Дури и сега, нашите противпожарни служби се блиску до границата, каде што ќе сторат се, за огнот да не се префрли на нашата територија“, додаде тој.
Директорот на Дирекцијата за заштита и спасување на граничниот премин кај Делчево пред два дена го пречека тимот за заштита и спасување од пожари на Р. Бугарија.
-Пристигнаа 25 пожарникари со 6 различни возила, кои ќе се упатат на критичните места опфатени со пожари на координација од ДЗС, информираа од институцијата.