Грчкиот министер за здравство, Василис Кикиљас објави нови мерки за спречување на ширењето на коронавирусот, по алармантниот скок на бројот на нови случаи во земјата и бројот на пациенти со тешки инфекции.
По средбата со здравствените и државните службеници, Кикиљас ги повика Грците, особено младите, да ги почитуваат заштитните мерки – да носат маски и да одржуваат социјално растојание, пренесува АП.
Грција регистрираше повеќе од 150 новозаразени лица во последните четири дена, а 203 случаи на КОВИД-19 беа потврдени во неделата, додека имало 152 од нив претходниот ден.
„За жал, преносот на вирусот покажува опасен тренд на раст. Уште еднаш, апелирам до младите луѓе и граѓаните кои не се придржуваат кон мерките за лична заштита да размислат за својата одговорност кон ранливите групи и земјата“, рече грчкиот министер.
Во Грција во моментов има 5.623 случаи на коронавирус, а 212 луѓе починале од почетокот на епидемијата.