Севкупните ризици и штетните ефекти од консумирањето алкохол се систематски проценети и добро документирани. Според најновите проценки на Светската здравствена организација (СЗО), консумацијата на алкохол придонела за 3 милиони смртни случаи на глобално ниво во 2016 година и е одговорна за 5,1% од глобалниот товар на болести и повреди. Консумацијата на алкохол е поврзана со зголемен ризик од многу здравствени состојби и е главна и доволна причина за неколку нарушувања, вклучувајќи зависност од алкохол, цироза на црниот дроб и други незаразни болести и ментални нарушувања. Алкохолот е еден од водечките фактори на ризик за предвремена смртност и инвалидитет поради неговата причинско-последична поврзаност со бројни здравствени состојби, вклучувајќи ненамерни повреди и самоубиства. Младите луѓе се несразмерно погодени од алкохол во споредба со постарите луѓе, при што 13,5% од сите смртни случаи кај луѓето на возраст од 20-39 години се припишуваат на алкохол. Обесправените и ранливите популации имаат зголемени стапки на смртни случаи и хоспитализација поврзани со алкохол.
Алкохолот е класифициран од страна на Меѓународната агенција за истражување на ракот како токсична, психоактивна супстанца која предизвикува зависност, како и како канцероген од групата 1, кој е каузално поврзан со седум видови на рак, вклучувајќи рак на хранопроводот, црниот дроб, дебелото црево и дојката. Консумацијата на алкохол е поврзана со 740.000 нови случаи на рак годишно на глобално ниво, пишува во истражувањето на „The Lancet Public Health“.
Во Европската Унија, умерено до лесно консумирање алкохол (<20 гр. чист алкохол дневно, што е еквивалентно на консумирање приближно <1,5 л. вино [12% алкохол по волумен], <3,5 л. пиво [5% алкохол по волумен] или <450 мл. алкохолни пијалоци [40% алкохол по волумен] неделно) беше поврзано со скоро 23.000 нови случаи на рак во 2017 година, што претставува 13,3% од сите видови на рак што му се припишуваат на алкохол и 2,3% од сите случаи на седумте видови рак поврзани со алкохол . Речиси половина од овие случаи (приближно 11.000) биле рак на дојка кај жени. Исто така, повеќе од една третина од случаите на рак кои се припишуваат на умерено консумирање алкохол (околу 8.500 случаи) биле поврзани со ниско ниво на потрошувачка (<10 гр. на ден).
Зголеменото ниво на консумирање алкохол е поврзано со зголемен ризик од болести и смртност, што го поставува прашањето дали може да се дефинира безбедно ниво на консумирање алкохол што не претставува ризик за здравјето. Идентификувањето на безбедно ниво на консумирање алкохол бара научни докази кои покажуваат отсуство на зголемен ризик од болест или повреда на тоа ниво. Некои, но не сите, студии сугерираат дека умереното консумирање алкохол може да има мал заштитен ефект, мерено според ризикот од одредени кардиоваскуларни заболувања или дијабетес тип 2.
Некои студии покажуваат постоење на такви ефекти кај одредени типови на кардиоваскуларни заболувања кај средовечни и постари лица. Сепак, неколку прегледи исто така покажаа дека заштитните ефекти на умереното консумирање исчезнуваат со повремена прекумерна потрошувачка, што го зголемува ризикот од било какви кардиоваскуларни болести.
Ниту една студија не покажала дека потенцијалниот заштитен ефект за кардиоваскуларни болести или дијабетес тип 2 го намалува ризикот од рак кај поединецот. Доказите не укажуваат на специфичен праг на кој канцерогените ефекти на алкохолот почнуваат да се манифестираат во човечкото тело. Како таква, не може да се утврди безбедна количина на консумирање алкохол за рак и здравје. Корисниците на алкохол треба да бидат објективно информирани за ризиците од рак и други здравствени состојби поврзани со консумирањето алкохол.