Локалните избори се ближат, а атмосферата во главниот град се загрева. Партиите ги подготвуваат своите стратегии, а граѓаните внимателно ги следат движењата на политичките актери. Во фокусот – прашањето кој ќе ја добие довербата да го води развојот на една од најдинамичните скопски општини – Кисела Вода, со проекти што се веќе реализирани, но и со нови предизвици што допрва доаѓаат. Кисела Вода е пред уште една важна одлука. Сообраќајот, општинската инфраструктура, парковите и зеленилото, санитарни проблеми и понудени решенија, политичките партии забрзано се подготвуваат за престојните избори наесен кои ќе одлучат кој ќе биде на чело на општината следните четири години. Во пресрет на локалните избори, Светлана Колариќ, претседателка на Советот на Општина Кисела Вода од редовите на ВМРО-ДПМНЕ, во изјава за „Локално“ истакна дека партијата секогаш донесува одлуки врз основа на темелна анализа и консултација со сите засегнати страни. Таа додаде дека не е тајна дека веќе се спроведуваат анкети меѓу граѓаните на Општина Кисела Вода во врска со можниот кандидат за градоначалник, но избегна да открие конкретни имиња.
„ВМРО-ДПМНЕ во изминатите години покажа зрелост, демонстрирајќи дека секоја одлука ја носи врз основа на претходна анализа на сите мерливи индикатори, преку анкети спроведени меѓу членството, граѓаните, невладините организации, бизнис-секторот и другите засегнати страни. Не е тајна дека се спроведуваат анкети меѓу граѓаните на Општина Кисела Вода во врска со предлог-кандидат за градоначалник. Не би сакала да спомнувам имиња, бидејќи цврсто верувам дека, без разлика кој ќе биде номиниран, тоа ќе биде најдоброто можно решение и дека ќе работи во интерес на граѓаните. Посветеноста, одговорноста, праведноста и чесноста се основни столбови по кои мора да се води секој што ќе ја добие честа да биде предложен кандидат или наследник на градоначалникот Орце Ѓорѓиевски, кој – морам да нагласам – ги подигна стандардите за функционирање на локалната самоуправа на многу високо ниво“, изјави Колариќ.
Колариќ истакна дека најголемите проблеми кои го оптеретуваа секојдневниот живот на граѓаните – како што се водовод, канализација, локални патишта, недостаток на простор за згрижување и образование на деца, неисчистени канали и недоволни паркови – сега се решени или се на самата фаза на завршување. Таа нагласи дека општината продолжува да работи на подобрување на инфраструктурата, со цел да ги задоволи потребите на растечкиот број на жители. Таа потенцираше дека бројот на жители во Кисела Вода продолжува да расте и веќе надминува 60.000, што го прави неопходно континуираното инвестирање во нови проекти кои ќе создадат урбано и квалитетно место за живеење.
„Најзначајно е да се истакне дека горчливите прашања поврзани со основните човекови потреби – водовод, канализација, локални патишта, недостаток на простор за згрижување и образование на деца, неисчистени канали, недоволен број паркови – се веќе решени или се во завршна фаза на реализација. Исто така, во изминатата година и оваа година, Општина Кисела Вода аплицираше и доби одобрение за реализација на значајни капитални проекти од Владата на Република Македонија, предводена од премиерот проф. д-р Христијан Мицкоски. Радува фактот што бројот на жители во општината расте и надминува 60.000, што јасно укажува на потребата од континуирана работа на нови проекти кои ќе придонесат за благосостојба и создавање на урбано и квалитетно место за живеење. Мора да се следи трендот на модернизација, дигитализација, урбанизација и создавање на еколошки одржливи средини во секое катче на општината. Дел од проектите ќе бидат координирани со централната власт, со што ќе се почитува начелото на рамномерен регионален развој, дел ќе произлегуваат од барањата, потребите и предлозите на жителите, а додадена вредност ќе претставуваат проектите финансирани од Европската Унија и меѓународни фондови, кои се достапни и отворени и за нашата земја“, смета Колариќ.
Колариќ истакна дека прашањето за паркирањето останува едно од најголемите предизвици со кои се соочуваат граѓаните на оваа општина. Колариќ нагласи дека веќе се преземени конкретни мерки за ублажување на оваа ситуација, како што се проширување на постојните паркинг-простори и создавање нови, но исто така, таа потенцираше дека растот на бројот на возила и зголемувањето на населението продолжуваат да создаваат дополнителен притисок.
„Прашањето за паркирањето е тема што постојано ја дебатираме со градоначалникот и членовите на Советот во изминатиот период. Реално, таму каде што беше неопходно, проблемите ги решававме со проширување на постојниот паркинг-простор, уредување на нови површини за паркирање, поставување столпчиња покрај тротоарите, одвојување велосипедски патеки, како и пренамена на една страна од улиците во паркинг-зони. Сепак, ова прашање и понатаму не тишти. Зголемениот број жители, уште поголемиот број возила, празните или пренаменети гаражи – сето тоа создава дополнителен притисок. Во моментов се бара најприфатливо и одржливо решение за надминување на овој проблем, кој ќе биде еден од приоритетите во новата програма“, смета Колариќ.
Во врска со прашањето дали ВМРО-ДПМНЕ во Општина Кисела Вода размислува за можни изборни коалиции, Колариќ истакна дека не е надлежна да одговара на такви прашања, бидејќи одлуките за коалиции ги носи Извршниот комитет на партијата. Таа нагласи дека било каква одлука во оваа насока ќе биде донесена од страна на партиското раководство. Кога станува збор за конкурентите на изборите, Колариќ потенцираше дека во улога на претседател на Советот, не е во нејзина надлежност да ја коментира политичката конкуренција.
„Не би сакала да одговорам на прашање за кое не сум надлежна – за тоа одлучува Извршниот комитет на партијата. Во улога на претседател на Советот, кој се грижи за координација и организација на седниците на комисиите и Советот на Општината, можам да истакнам дека соработката со сите членови на Советот – претставници од коалициските партнери и од опозициските партии – се одвива на највисоко професионално ниво“, децидна е Колариќ.
Претседателката на Советот на Општина Кисела Вода, истакна дека реализираните проекти во изминатите три и пол години се јасен показател за успешноста и непобедливоста на ВМРО-ДПМНЕ. Таа нагласи дека секогаш кога се оди на избори, започнува нова битка, но изрази увереност дека победата на локалните избори во 2025 година ќе биде убедлива и дека ВМРО-ДПМНЕ ќе ја продолжи својата доминација.
„Ветените и реализираните проекти во изминатите три и пол години се јасен показател за успешноста и непобедливоста, без вистинска конкуренција. Секогаш кога се оди на избори се започнува од нула, ниту една победа не се освојува лесно, но во едно сум сигурна, Победата на Локалните избори во Општина Кисела Вода 2025 година ќе биде убедлива во корист на ВМРО-ДПМНЕ“, става во дознаење Колариќ.
Колариќ истакна дека градежните активности за реконструкција на спортскиот центар „Расадник“ се одвиваат според планираната динамика. Таа нагласи дека овој капитален проект, поддржан од Министерството за спорт, ќе донесе современ простор кој ќе биде опремен за различни спортски активности како ракомет, кошарка, мал фудбал, фитнес и спа центар. Таа потенцираше дека старото, руинирано спортско објект со ограда и исполнет со смет, сега е ставено зад нас.
„Градежните активности се одвиваат со одлична динамика, согласно со планираното. Овој капитален проект се реализира со поддршка од Министерството за спорт, и со неговата реконструкција е предвидено да се добие современ простор за ракомет, баскет, мал фудбал, фитнес-центар, теретана и спа-центар. Стариот, руиниран простор, ограден со железо и исполнет со смет, го испративме во историјата. За кратко време ќе бидете поканети на отворањето на објект со модерен лик, обоен во црно-црвена боја“, завршува Колариќ.
Д.Ѓ