СДСМ смета дека е комично тоа што премиерот Христијан Мицкоски за „пет минути“ ги проверил доказите кои СДСМ ги достави за вицепремиерот Изет Меџити. Обвинуваат дека тој го штити вицепремиерот и се „прави слеп на докази кои се јасно потврдени од институциите на државата“.
-Прво криеше дека Меџити има планирано 3.000 партиски вработувања додека списоците за вработувањата веќе на големо се споделуваат по социјалните мрежи. Сега го крие и штити за скандал и прекршување кое го потврдил со документи Државниот управен инспекторат. Мицкоски, кој тврдеше дека ќе бара одговорност од секој функционер кој се огрешил, денеска по кој знае кој пат си го погази ова ветување. СДСМ му даде шанса да докаже на дело дека се залага за владеење на правото и почитување на процедурите и да побара одговорност од Изет Меџити, но тој реши да го штити. Со што го задолжил Меџити Мицкоски за вака да се брука? При јасни докази наведени од Државниот управен инспекторат Мицкоски се прави слеп, порачаа од „Бихаќка“.
Претходно Владата ги провери и ги отфрла шпекулациите и неточните наводи изнесени од СДСМ и ДУИ во врска со работата на Министерството за животна средина и просторно планирање. Како што соопштуваат од владината прес- служба, инспекцискиот надзор спроведен од Управниот инспекторат се однесува на аспекти на архивското работење и не утврдил незаконско постапување.
Не може административна работа или архивска работа да се прикаже како голем скандал. СДСМ оди по паметот на ДУИ, синхронизирани се- реагира првиот вицепремиер по обвинувањата на Социјалдемокртскиот сојуз дека работел незаконски, лично потпишувајќи ги сите предмети, без законска основа и без почитување на процедурата за административно постапување.
„Се работи за редовна контрола која е во програмата на Државниот административен инспекторат. Тие имаат забелешка, опомена за воспоставена пракса, а не за ингеренции. Тоа е пракса воспоставена од ДУИ и СДСМ, од 2016-TA година“, рече Меџити.
Вчера, пак, со документи добиени од свиркачи, СДСМ тврдеше дека поради злоупотреба, Државниот управен инспекторат со решение официјално ги одзел ингеренциите на Меџити во делот на потпишувањето на административни документи.