Европската комесарка за проширување Марта Кос објави дека денес се сеќаваме на жртвите кои загинаа на 1 ноември 2024 година, кога се урна настрешницата на железничката станица во Нови Сад.
„Пред една година, уривањето на железничката станица во Нови Сад одзеде 16 животи. Денес се сеќаваме на нив. Оваа трагедија ја менува Србија. Ги поттикна масите да се залагаат за одговорност, слобода на изразување и инклузивна демократија. Ова се истите вредности што ја доведоа Србија кон ЕУ“, напиша Кос на X.
Како што претходно беше објавено, делегацијата на Европската Унија (ЕУ) во Србија, по повод одбележувањето на првата годишнина од уривањето на настрешницата, апелираше до сите да ги оплакуваат жртвите со достоинство и мир, како и да ги смират тензиите и да избегнат насилство.