Косовската полиција потврди дека почнала постепено повлекување од општинските објекти на северот од земјата, како што е договорено на средбата меѓу вицепремиерот на Косово, Бесник Бисљими и претставникот на ЕУ за дијалогот меѓу Белград и Приштина, Мирослав Лајчак, јавува „Репортери“.
Заменик-директорот на полицијата за северниот регион, Ветон Елшани соопшти дека одлуката на Владата е прифатена од Управата на полицијата веднаш штом била примена и била испратена „на терен“ на извршување.
„Одлуката на Владата на Косово почна да се спроведува“, рече Елшани.
Ден по средбата меѓу Бисљими и Лајчак, Владата на Косово ги презентираше деталите за што точно договориле, наведувајќи дека главниот фокус на средбата бил создавање предуслови за целосно и безусловно спроведување на Основниот договор од 27 февруари и Охридскиот анекс од 18 март.
Владата во Приштина пред два дена соопшти дека е подготвена да придонесе за деескалација на ситуацијата, што го вклучува и сегашното намалување на полициското присуство за 25 отсто во и околу општинските згради во четирите општини на северот, пишува „Косово онлајн“.