Портпаролот на СДСМ, Костадин Костадинов на прес конференција посочи дека опозициската ВМРО-ДПМНЕ ја копира програмата на владејачката партија за инфраструктурата.
„Извршителу Мицкоски, кога ќе те фатат како препишуваш, се паѓа на испитот. Мицкоски падна на испитот, може да се пријави за 4 години, ако се уште остане претседател на криминалната ВМРО-ДПМНЕ после поразот на 12 април. Денеска видовме како извршителот на Груевски, Христијан Мицкоски, ја препишува, ја копира програмата на СДСМ за инфраструктурата. Нема идеја, нема програма, фокусиран на одбрана на криминалот на Груевски, извршителот Мицкоски копира од СДСМ“, рече Костадинов.
Тој обвини дека во ВМРО-ДПМНЕ нема ништо сменето, додавајќи дека е истата нереформирана партија заробена од Никола Груевски.
„Па згора на се на прес- конференција реди проекти кои веќе се во реализација, влезени во програмата на Јавното претпријате за патишта. Ништо не е сменето во ВМРО-ДПМНЕ, тоа е истата нереформирана, заробена партија од Никола Груевски. Граѓаните знаат, за 11 години криминално владеење на ВМРО-ДПМНЕ се изградија вкупно 10 километри автопат. Јавноста многу добро памети дека за време на владеењето на ВМРО-ДПМНЕ парите од Буџетот се трошеа на барок, споменици и палми наместо на автопати, водоводи и канализации. Секој проект беше криминалем, со коруптивни зделки и скандали, со проценти, како што чувме од разговорите на Јанакиески и Груевски во стилот „да не се претераме“. На започнатиот дел од автопатот Миладиновци-Штип затекнавме бандери на сред пат, немаше предвидено клучки ниту приклучоци за делницата на автопатот до Охрид“, истакна Костадниов.
Портпаролот на СДСМ посочи дека владејачката партија за разлика од ВМРО-ДПМНЕ, во само 2.5 години мандат, изградила и рехабилитирала 750 километри патишта, а го завршила автопатот Миладиновци-Штип и ги разрешила сите недостатоци.
„Откочена е и изградбата на автопатот до Охрид, каде се поправија исто сите грешки и дупки во проектот. Нема пат во земјава којшто не е обновен или веќе во фаза на обнова. За само 2,5 години изградивме 400 километри канализации и водоводи. Со еден збор, ВМРО-ДПМНЕ 11 години крадеше пари од граѓаните, СДСМ гради патишта, водоводи, канализации, се што е потребно за граѓаните. Затоа следи одговорност за украдените пари и нов пораз од граѓаните на 12 април. Режим никогаш повеќе“, додаде Костадин Костадинов.