Премиерот Димитар Ковачевски ја поддржа вечерашната „Парада на гордоста“ во Скопје, истакнувајќи дека секој има право на почит, достоинство, прифаќање без предрасуди и еднакви можности за самореализација.
-Затоа грижата и напорите кои ги вложуваме да обезбедиме афирмација и отворен простор за активно учество на ЛГБТИК+ заедницата остануваат наши патокази во градењето демократско општество кое практикува европски вредности и во кое има место за сите. Како Влада посветено работиме за да овозможиме добробит на сите граѓани – донесовме Закон за спречување и заштита од дискриминација каде влегоа и сексуалната ориентација и родовиот идентитет. Комисијата за заштита од дискриминација за прв пат има лица и од граѓанскиот сектор. Има уште предизвици, но заедно и посветено ќе ги решаваме и надминуваме, објави Ковачевски.
Премиерот истакна дека „Парадата на гордоста“ е едно од значајните демократски случувања во Северна Македонија.
Парадата почнува во 17 часот во паркот „Жена-борец“, од каде во 19 часот ќе тргне протестниот марш по скопските улици и ќе заврши со културно-забавна програма на стадионот на АРМ во Градскиот парк.