Косово се соочува со безбедносни закани од странство, особено од Србија, изјавил косовскиот премиер Албин Курти на вториот ден од Мировниот форум во Париз, пренесува приштинска „Коха“.
Курти го споменал нападот во Бањска, нагласувајќи дека тоа е изговор за влез на српската војска во Косово.
„Не постојат само внатрешни закани за безбедноста, туку има и надворешни закани за безбедноста и ова е поврзано со геополитичките времиња низ кои поминуваме, а од друга страна има врска со нашиот северен сосед кој не ја признава нашата земја. Пред неполни два месеци го имавме нападот на терористичка паравоена група од Србија на северот од нашата земја. Убија косовски полицаец и сакаа да предизвикаат голема ескалација за да создадат тотален хаос како изговор за влезот на српската војска во Косово“, рекол косовскиот премиер.
Курти додал дека Косово има само една алтернатива, влез во Европската унија и НАТО.
„За безбедноста на нашата земја треба да се справиме со овие групи кои сакаат да бидат како Вагнер кои сакаат да предизвикаат дестабилизација и мораме да се фокусираме на геополитичката ситуација каде што немаме алтернатива бидејќи не сакаме да имаме алтернатива, туку ЕУ и НАТО, но има земји кои размислуваат и прават нешто друго“, посочил тој.
На прашањето дали ЕУ може да му помогне на Косово, Курти изјавил дека верува во две обврски кои произлегуваат од тоа.
„Имаме две ветувања, едно од Фон дер Лајен за планот за проширување, но го имаме и ветувањето на Шарл Мишел дека 2030 година е година кога ЕУ и Западен Балкан ќе се обединат. Имаме време и суштина и мора да го искористиме за да влеземе во пат кој е неповратен. Не сите земји имаат иста страст и желба за членство во ЕУ“.
Курти бил прашан и за идејата за размена на територии. Тој нагласил дека идејата не е мртва, но нема можност да се реализира.
„Како што Москва е незадоволна од распадот на СССР, Белград не е задоволен од распадот на Југославија, кој самиот го предизвика. Живееме во време кога овој проект за размена на територии пропадна, но идејата не е мртва, а тоа често го гледам кога го слушам претседателот на Србија како јавно зборува. Луѓето кои сонуваа за размена на граници тешко се ослободуваат од носталгијата и учествуваат во демократски и европски решенија… и покрај неуспехот на проектот, идејата постои, но без можност да се реализира. Колку побрзо ги нормализираме односите со де јуре и де факто признавање, толку подобро ќе биде за сите“, заклучил Курти.
Косовскиот премиер смета дека бидејќи Косово нема визна либерализација, земјата не добила ниту статус на земја кандидат за членство во ЕУ.
Курти изјавил и дека ниту една од соседните држави на Србија нема да биде безбедна додека не влезе во ЕУ.