Специјалниот претставник на ЕУ за дијалог меѓу Белград и Приштина, Мирослав Лајчак, денеска на својот Фејсбук профил објави дека се надевал на подобар резултат од минатонеделната мисија на Косово со заменик-помошникот државен секретар на САД и специјален пратеник за Западен Балкан, Габриел Ескобар.
„Отпатувавме во регионот со цел да се справиме со тензичната ситуација во северот на Косово на која сите бевме сведоци во текот на изминатата недела и да го истражиме потенцијалот за политичко решение. Во Косово се сретнавме со највисокото раководство, вклучително и претседателката (Вјоса) Османи, премиерот (Албин) Курти и првиот вицепремиер (Бесник) Бисљими. Дискусијата беше долга. Ја пренесовме нашата загриженост за ситуацијата на северот и ја истакнавме потребата од итна деескалација“, посочи Лајчак.
Тој потврди дека и ЕУ и САД побарале итна деескалација, предвремени избори со учество на косовските Срби и враќање на дијалогот за нормализација.