Од ЈП Лајка информираа дека кучето Црно за кое се пишува низ социјалните мрежи не е исчезнато туку се наоѓа во стационарот.
-Би сакале да ја информираме јавноста во врска со шпекулациите на социјалните мрежи, за наводно исчезнување на кучиња од прифатилиштето на ЈП ЛАЈКА.
Кучето Црно кое во нашата евиденција е под името Мепсо, беше заловено во централното градско подрачје, по пријава за напад врз наша сограѓанка и нејзиниот миленик е згрижено и сеуште се наоѓа во прифатилиштето на ЈП ЛАЈКА.
Најостро ги демантираме сите гласини дека кучето е исчезнато или еутанизирано. Напротив, иако Мепсо го има поминато комплетно целиот хуман третман во нашето прифатилиште, тим на негователи и дресер континуирано и трпеливо работат на негова ресоцијализација и минимизирање на неговата агресија.
Ги применуваме успешно сите стандардни техники и методи, што е видливо во неговиот позитивен прогрес на однесување.
Нагласуваме дека кучето е под постојан надзор и истото комуницира со точно одредени вработени на кои веќе почнува да им верува. Секој дополнителен стрес или непочитување на неговата дневна рутина би не вратил чекор назад. Посетите на ова трауматизирано куче од страна на лица кои не се стручни, под полна одговорност изјавуваме дека не се дозволени и истите би значеле ризик и експеримент, соопштија од ЈП „Лајка“.