Свирепа и страшна приказна за животот на едно куче објави денеска ЈП „Лајка“. Се работи за куче од раста германски овчар за кое сопственикот повеќе не сакал да се грижи, па во дванаврати го оставил на различни локации.
Имено, тие велат дека по пријава од граѓани за куче кое веќе подолго време е на јавен простор, напуштено, без сосптвеник беше заловено куче од нивните екипи на 18.10.2023 година во општина Аеродром.
„По стандарна проверка се воспостави дека кучето има микрочип, а неговиот сопственик веднаш беше контактиран. Наредниот ден на 19.10.2023 кучето беше превземено од неговиот сопственик, кој си плати за заловување на кучето, согласно правилникот за работа на ЈП Лајка“, велат од ЈП Лајка.
Додаваат дека на 26.10.2023 по пријава од граѓани дека има напуштено и заробено куче во напуштена фабрика во населба Автокоманда, нивни екипи веднаш постапиле по пријавата.
-Кога пристигнаа на посочената локација, го најдоа истиот германски овчар, напуштен и ВРЗАН во напуштената фабрика. Кучето беше изгладнето, изнемоштено и болно, свесно оставено без пристап до вода и храна, видно вознемирено, но среќно кога виде дека доаѓаат луѓе да му помогнат. Кучето веднаш доби вода и храна, а и самото влезе во нашето комбе, истакнале од „Лајка“.
Овојпат кучето останува со нив до негово вдомување, а случајот ќе биде пријавен до Агенција за храна и ветеринарство, а и ќе биде покренета кривична постапка согласно член 233 од кривичен законик за мачење на животни до сопственикот на ова куче.
Од „Лајка“ велат дека состојбата на кучето не е најдобра, но се надеваат дека за брзо време ќе биде добро и ќе биде објавено за вдомување.