Понудата на Швајцарија да стане посредник во врска со Украина нема да помине бидејќи Берн не е доверлив, изјави рускиот министер за надворешни работи Сергеј Лавров.
„Тие (Швајцарија) сега се обидуваат да бидат посредник во Украина – ништо нема да излезе од тоа. Ова не е играч на кој може да му се верува“, порача тој.
Претседателката на Швајцарската Конфедерација, Виола Амхерд, по состанокот со украинскиот претседател Володимир Зеленски на 15 јануари рече дека тој побарал да се организира мировна конференција на високо ниво, а Берн позитивно одговорил на ова барање.
Швајцарскиот министер за надворешни работи Игнасио Касис на 14 јануари во Давос изјави дека Русија треба да биде вклучена во дискусијата за мировно решение.
Швајцарија, која не е членка на НАТО и ЕУ, ги поддржува антируските санкции на ЕУ. Во 2022 година, руската влада усвои список на странски земји и територии кои вршат непријателски дејствија против Русија, нејзините компании и граѓани. На оваа листа е и Швајцарската Конфедерација.