Со утрешното доаѓање на еврокомесарот Јоханес Хан започнува скрининг процесот во Македонија. Под лупа ќе биде ставено владеењето на правото, судството, корупцијата, слободата и безбедноста. Владата летото ја чека напорна работа со оглед дека ќе се чешлаат 33-те поглавја за Македонија, и треба да се формираат 33 работни групи во кои ќе се ангажираат над илјада лица од институците и од граѓанскиот сектор.
Со денови заседаваат работните групи за формирање на Државната изборна комисија, клучна за спроевдување на референдумот. Партиски договор нема, и доколку тоа не се случи, според Заев можна е и лидерска средба. Лидерската беше најавена по бриселскиот самит, а на неа, според најавите треба да биде и прашањето за референдум, конструкцијата и дилемата за тоа дали ќе биде консултативен или задолжителен.
Ова се случува во предворје на утрешната посета на еврокомесарот Јоханес Хан. Со неговото доаѓање, Македонија и официјално го започнува скрининг процесот кој е претходница на почетокот на преговорите за членство на Македонија во Европската Унија.
Според агендата, Хан во текот на утрешниот ден ќе има средба со премиерот Заев, а потоа и со претседателот на Парламентот Талат Џафери, како и со лидерот на опозициската партија ВМРО-ДПМНЕ, Христијан Мицкоски. Инаку, скринигот подразбира дека Европската комисија ќе подготви распоред за поглавјата кои ќе се отвораат, а институции треба да ги обезбедат бараните податоци. Според неодамнешната изјава на еврокомесарот, скринингот е подолг процес, треба да се подготват сите 35 поглавја кои ги покриваат пристапните преговори, и како што рече, клучно е тоа да се направи за една година, пренесува 24 вести.