Лидерот на ЗНАМ, Максим Димитриевски му честиташе на ВМРО-ДПМНЕ за победата на парламентарните избори, како и на Гордана Силјановска-Давкова за функцијата претседателка на државата. Тој најави дека ЗНАМ од вечерва ја почнува својата борба за достоинствена Македонија.
Според него, ЗНАМ испиша историја и пратеничка група со освоени околу 60 илјади гласови. Димитриевски истакна дека со граѓаните ќе ја креираат убавата слика на Македонија.
-Сакам да им се заблагодарам на членството на ЗНАМ кое се посвети на оваа историска и голема победа. Се потврди дека нема повеќе да живееме во црн-сив свет, туку етаблиравме нов политички субјект на политичката сцена, изјави Димитриевски.
-Ние сме лев центар, гледам дека веќе некои не копираат, додаде Димитриевски.
Најави дека ќе остане градоначалник на Куманово и доследен на ветувањата и нема да направи „трансфер“ во новата Влада.
-ВМРО-ДПМНЕ на претседателските избори единствено изгуби од Максим Димитриевски во Куманово и јас сум горд на моите кумановчани, кажа Димитриевски.
Рече дека нема пад на бројките во однос на неговите резултати од првиот круг на претседателските избори.