Не го следев целиот говор на господинот Пендаровски, но мислам дека критиката на бојкот и на обидот да се киднапира гласачкото право, да се одземе нивното право е добра констатација. Јас кажувам дека сум свесна дека кампањата и дебатите се најстрасниот политички процес, но во дебатите со него завршивме пристојно со помош на координаторите и добрите новинари, изјави вечерва кандидатката за претседателка, Гордана Силјановска-Давкова во свое обраќање од седиштето на ВМРО-ДПМНЕ.
Професорката има убедливо водство пред Пендаровски според резултатите на ДИК и по се изгледа ќе биде новата шефица на државата. Најави дека ќе биде претседателка на сите граѓани и дека портите на нејзините канцеларии ќе бидат отворени за сите.
Не се согласува со тезата дека гласовите ги добила заради набој со национализам. Вели дека во нејзиниот тим имала и Албанци и Турци и Роми и дека сите ќе ги вклучи во претседателскиот кабинет.
На прашањето дали ѝ се јавил противкандидатот Пендаровски и дали ѝ честитал за победата, Силјановска кажа дека верува дека го сторил тоа, но не може да каже со сигурност бидејќи го заборавила мобилниот телефон.