Претседателот на Ракометниот сојуз на Словенија (РСС), Бор Розман, ја објави можноста за организирање на Европското првенство за мажи во 2034 година од страна на Македонија, Србија и Словенија. Првиот човек на словенечкиот ракомет зборувал за ова на Собранието на РСС организирано во рамките на „Денот на ракометот“.
Според него, идејата на Словенците е да бидат домаќини на две групи во прелиминарната фаза од натпреварувањето, една група од главната фаза, како и едно полуфинале, додека финалето би се одржало во српската престолнина поради капацитетот на белградската Арена.
Според првичните размислувања, Македонија би била домаќин на група во првата фаза, како и на натпреварите од вториот сегмент.
Србија го организираше Европското првенство во 2021 година во машка конкуренција – осум години по Словенија, која беше домаќин во 2004 година. Македонија никогаш не организирала сениорско машко натпреварување.