Селекторот на Италија Роберто Манчини го врати во репрезентацијата 31-годишниот Марио Балотели, кого своевремено го тренираше во Интер и Манчестер Сити.
Манчини го објави списокот од 35 играчи за претстојниот собир на Азурите од 26 до 28 јануари, како дел од подготовките за натпреварот против Македонија на 24 март во Палермо во рамките на плејофот за Светското првенство во Катар 2022 година.
На таа листа посебно внимание привлече името на Марио Балотели. 31-годишниот фудбалер моментално настапува за Адана Демирспор во Турција. Овој клуб е едно од најпријатните изненадувања во првенството, најмногу благодарение на италијанскиот напаѓач. Адана моментално е четврта во турската Суперлига, а за тој успех придонесе Балотели со осум гола и три асистенции.
Балотели за „азурите“ одигра 36 натпревари и постигна 14 гола. Последен пат настапи на 7 септември 2018 година на мечот со Полска.
Во текот на својата богата кариера, Балотели играше за Лумецане, Интер, Манчестер Сити, Милан, Ливерпул, Ница, Марсеј, Бреша и Монца.
Mario Balotelli has been recalled to the Italian national team by Roberto Mancini for the first time since 2018 🇮🇹 pic.twitter.com/5obNJo3YLs
— ESPN FC (@ESPNFC) January 24, 2022