Како што пренесува Euronews, Маск пред присутните зборуваше и за можни решенија поврзани со човечкото стареење.
Основачот на Tesla и SpaceX разговараше со извршниот директор на BlackRock, Лери Финк, што претставува пресврт во однос на неговиот претходен став, имајќи предвид дека Маск во минатото го критикуваше форумот како елитистички и здодевен. Финк ја отвори сесијата повикувајќи ја публиката на посилен аплауз за Маск, забележувајќи дека првиот обид не бил доволно ентузијастички.
Маск настапот го започна со шега поврзана со територијалните амбиции на американскиот претседател Доналд Трамп, алудирајќи на мировен самит и споменувајќи „мал дел од Гренланд“ и „мал дел од Венецуела“, што предизвика ограничен смеа во салата. Тој повторно се наврати и на своите изјави за вонземски живот, велејќи дека често го прашуваат дали има вонземјани меѓу нас и дека тој на шега одговара дека е еден од нив.
Според Маск, вештачката интелигенција и роботиката ќе предизвикаат економска експлозија без преседан. Тој изјави дека ќе се произведат толку многу роботи и системи на вештачка интелигенција што тие ќе можат целосно да ги задоволат човечките потреби. „Моето предвидување е дека ќе има повеќе роботи отколку луѓе“, рече Маск.
Тој најави дека хуманоидните роботи Optimus на Tesla ќе извршуваат едноставни задачи во фабриките до крајот на оваа година, а посложени индустриски работи во рок од 12 месеци. Маск додаде дека ваквите роботи би можеле безбедно да се грижат за деца или домашни миленици, доколку се доволно сигурни.
Милијардерот прогнозираше дека вештачката интелигенција ќе стане попаметна од кој било поединец до крајот на 2026 година, а колективната интелигенција на човештвото ќе ја надмине во рок од пет години. Тој исто така истакна дека Tesla веќе започнала услуги со роботакси во неколку американски градови и очекува нивна широка примена низ САД до крајот на годината.
Зборувајќи за долговечноста, Маск рече дека стареењето е „многу решлив проблем“ и дека, откако ќе се идентификува неговата причина, таа ќе биде очигледна за научниците. Тој додаде дека се надева оти веќе следниот месец ќе добие европско одобрение за возилата, без да прецизира за кои земји станува збор.
Маск беше додаден на програмата на WEF во последен момент и се појави еден ден откако на форумот се обрати и Доналд Трамп. Неговото учество се смета за значаен пресврт, со оглед на тоа што во претходните години форумот го нарекуваше здодевен и го критикуваше како тело што сè повеќе наликува на „неизбрана светска влада“. Во декември 2022 година, тој изјави дека одбил покана за Давос токму поради тоа што му звучела „ужасно здодевно“.
Според листата на милијардери на Forbes, богатството на Елон Маск се проценува на околу 779 милијарди долари.