Во Полска во текот на ноќта се случило злосторство кога 19-годишен маж упаднал во дом за сираци и нападнал деца на возраст од 12 до 16 години, како и еден чувар.
Од повредите почина 16-годишно девојче од Домот за незгрижени деца во градот Томиславце, а според првичните информации се работи за напад со нож, пренесуваат полските медиуми.
„Добивме пријава во 23 часот и 15 минути. За жал, едно лице почина, а пет се хоспитализирани. Уште седуммина од нив побарале психолошка помош. Сторителот најверојатно не е од оваа установа“, изјави Јакуб Стејбах од Противпожарната бригада во Стерај за „Виртуелна Полска“.
Повредените не се во животна опасност и се наоѓаат во болница.
Полицијата го уапсила напаѓачот во текот на ноќта. Станува збор за 19-годишен маж од Варта кој претходно не ѝ бил познат на полицијата. Тој бил подложен на тестови за алкохол и психоактивни супстанци.
Инспекторите се обидуваат да ги откријат околностите на овој настан.