Поранешната германска канцеларка Ангела Меркел побарала совет од папата Франциск за справување со Доналд Трамп кога тој првпат бил избран за претседател на САД, надевајќи се дека ќе најде начини да го убеди човекот за кој сметала дека има инвеститорски менталитет да не се повлекува од Парискиот климатски договор.
Во своите мемоари, чии делови беа објавени во германскиот неделник „Die Zeit“ доцна во средата навечер, долгогодишната германска канцеларка детално ги објаснила нејзините потешкотии во односите со Трамп, кој изгледал дека е фасциниран од рускиот претседател Владимир Путин и другите авторитарни лидери.
„Тој гледаше сè од перспективата на претприемач каков што беше пред да влезе во политиката“, напишала таа. „Секоја парцела може да се продаде само еднаш, а ако тој не ја добие, тогаш некој друг ќе ја добие. Така го гледаше светот“.
Папата Франциск, кога Меркел, генерално, побарала од него совет за постапување со луѓе „со фундаментално различни ставови“, веднаш сфатил дека таа мислела на Трамп и неговата желба да се откаже од климатските договори, напишала поранешната германска канцеларка.
Кога Трамп првпат ја презеде функцијата во 2017 година, Меркел беше една од избраните лидери со најдолг стаж во светот и убедливо највлијателна во Европската унија откако го обликуваше одговорот на Германија и на континентот на должничката криза во еврозоната, пандемијата со Ковид-19 и односите меѓу Русија и Украина во 2014 година.
Напишана пред реизборот на Трамп, книгата ја изразува „искрената надеж“ дека потпретседателката Камала Харис ќе победи на изборите во САД.
Нејзините мемоари, под наслов „Freedom: Memories 1954-2021“, ќе бидат објавени во повеќе од 30 земји на 26 ноември. Таа ќе ја претстави книгата во САД една недела подоцна на настан во Вашингтон со поранешниот претседател Барак Обама, со кого има блиски политички односи.