Лео Меси на 37 години игра за Интер од Мајами, но како што стојат работите се уште нема намера да се пензионира. Тој меѓу редови изјави дека би сакал да се врати на големата фудбалска сцена, што веднаш предизвика реакција кај навивачите на неговиот поранешен клуб – Барселона.
„Многу ми недостигаат навивачите на Барселона и се надевам дека наскоро ќе се видиме повторно. Верувам дека тие се горди што се дел од најдобриот клуб во светот“, изјави Меси за каталонскиот Мундо Депортиво.
Тоа веднаш предизвика реакции на навивачите на Барселона на социјалните мрежи, кои сметаат дека тоа е навестување за враќањето на нивниот миленик на „Камп Ноу“, додека има и такви кои не се преголеми оптимисти.
Меси во Барселона пристигна како 12-годишно момче од Аргентина, каде ги помина сите помлади категории, а потоа настапуваше за сениорскиот тим со кој ги освои сите можни трофеи.
Тој го напушти каталонскиот клуб во 2021 година од финансиски причини бидејќи клубот не можеше да му понуди нов договор.