Претседателот на ВМРО-ДПМНЕ, Христијан Мицкоски му го честиташе реизборот и победата во вториот круг од турските претседателски избори на Реџеп Таип Ердоган.
-Честитки за значајната и јасна победа на големиот пријател на Македонија Реџеп Таип Ердоган. Посакувам успешен мандат и нови достигнувања на пријателскиот турски народ и пријателска Турција, објави Мицкоски на социјалните мрежи.
Резултатите од Анкара покажуваат дека Ердоган тесно победил во вториот круг. Врховниот изборен совет на Турција допрва треба официјално да ги потврди овие резултати, но се чини дека Ердоган има околу 52 отсто од гласовите, додека Киличдароглу освои околу 48 отсто.
Во првиот круг на 14 мај, Ердоган освои 49,52 отсто од гласовите, додека Киличдароглу 44,88 отсто.
Додека актуелниот претседател влезе во вториот круг со силен моментум и предност пред неговиот ривал, неговите шанси беа зголемени со поддршката на националистот Синан Оган, кој беше трет во претседателската трка.
Оган ја наведе Партијата на правдата и развојот (АК Партија) на Ердоган, која го освои парламентарното мнозинство, како причина за неговата одлука. Партијата АК и нејзините сојузници обезбедија 323 места во 600-члениот парламент на симултаните избори одржани на 14 мај.
Клучните теми кои ја одбележаа кампањата се економијата, надворешната и миграциската политика.