Северна Македонија ги исполни сите демократски услови за почеток на пристапните преговори со ЕУ, но земјата беше „клоцана“, од кој стигне и на кој му одговара, рече хрватскиот претседател Зоран Милановиќ во четвртокот, откако официјална Софија ги осуди неговите изјави за бугарската евроинтеграциска политика на земјата.
На самитот на земјите од Западен Балкан во Брдо кај Крањ во понеделникот, претседателот Милановиќ остро ја нападна Бугарија, која го услови влезот на С. Македонија во ЕУ со промена на учебниците по историја.
Милановиќ тогаш рече дека активно ќе се спротивстави на барањето на земјата-аспирант да ја дефинира нејзината национална генеза во учебниците по историја како што тоа го прави соседната земја, додавајќи дека „тоа е хрватско искуство дека никогаш не завршува добро за оној што врши притисок“.
„Тие порано ја третираа Македонија како „side kick“, некој што го клоцате од страна, а ако имате внатрешно-политички проблем што не можете да го решите, тогаш секогаш можете да удрите по Македонија. Тоа не е правилно“, рекол шефот на државата одговарајќи на прашањето на новинарите, пренесе Хина.
Според него, „Македонија и македонскиот народ досега платиле прилично висока цена“.
„Тие играат многу добро и според правилата. Тие ги исполнија сите демократски услови што може да се замислат, тоа е мултинационална заедница во која има многу Албанци и таа соработка е примерна“, додал Милановиќ.
Тој исто така потсети дека поранешната југословенска република, меѓу другото, „се покорила на грчките барања да се стави „Северна“ пред името Македонија“.
„Конечно, тие беа прифатени во друштвото на мртви поети, а сега оваа состојба, која навистина влегува во нивниот интимен простор“, изјавил хрватскиот претседател, додавајќи дека земјата е „жртва на недостаток на интерес и, елементарна емпатија“.
„Тоа не се прави во 21 век. Тоа апсолутно не е основа за утрешниот соживот во Европската унија“, истакнал Милановиќ.