Кога станува збор за европската интеграција, Македонија има избор, вели црногорскиот претседател Јаков Милатовиќ, кој оценува дека граѓаните и политичарите во земјава мора да одлучат дали „сакаат да бидат во право“ или дали земјата треба да стане членка на ЕУ.
„Мислам дека на Северна Македонија ѝ е нанесена голема неправда во процесот на европска интеграција. Дека тоа е земја која, како што рековте, одамна доби статус на кандидат – во 2005 година, дури и пред Црна Гора да ја врати својата независност. Сепак, честопати билатералните односи меѓу Македонија и соседите на Македонија се главната пречка на патот кон ЕУ. И токму од таа причина јас морам да кажам овде, поради македонските граѓани, нашите пријатели, искрени пријатели, во Црна Гора ние Македонците ги доживуваме како браќа. И ова не е став на претседателот на Црна Гора, ова е став на еден обичен човек во Црна Гора, а тоа е дека на сите ни се чини дека навистина на Македонија ѝ е направена неправда и дека Македонија често, како што реков, беше заробеник на одредени билатерални односи и понекогаш на непотребно големи барања на соседите во опкружувањето. Но, знаете како, светот во кој живееме не е секогаш праведен. Јас мислам дека вие имате една добра претседателка, мислам дека имате една способна влада. Во секој случај македонските граѓани, македонските носители на одлуки најдобро ќе знаат на кој начин да пристапат кон сето ова. Во оваа смисла, Црна Гора сега се перцепира од ЕК како најнапредна од сите десет кандидати (за членство во ЕУ)“, рече Милатовиќ во интервју за емисијата „360 степени“ емитувана на МРТ1.
Според него, Црна Гора има амбициозна, но остварлива цел – да стане 28-ма земја-членка на Европската Унија до 2028 година.
„И иако е најмала меѓу сите земји-кандидатки, Црна Гора сака да испрати важна порака со својот пример, заедно со своите партнери во Европа, дека проширувањето е живо, дека се случува, дека тоа не се само зборови на европски политичари“, смета црногорскиот претседател.
Како одговор на прашањето дали верува дека земјите-членки на ЕУ ќе го ратификуваат само договорот за пристапување на Црна Гора или дека земјата ќе мора да почека другите земји-кандидатки за ЕУ да го завршат процесот на пристапување за да се приклучат кон ЕУ како група, Милатовиќ одговори дека е сосема реално во 2028 или 2029 година, „но секако во рамките на мандатот на сегашната Европска комисија, Црна Гора и Исланд да станат членки на Европската Унија“.
Според претседателот на Црна Гора, Северна Македонија не е единствената земја што има „одредени билатерални проблеми“ во процесот на европска интеграција.
„Рековте дека Црна Гора има и некои отворени прашања со Хрватска, која е моментална членка и која, во однос на Црна Гора, има поголема „влијание“, поголема моќ во контекст на преговарачкиот процес. Хрватска, за жал, веќе блокираше едно преговарачко поглавје, кое технички беше подготвено за затворање, но во политичка смисла Хрватска не крена рака за ова. Затоа се надеваме дека во претстојниот период ќе можеме да решиме некои отворени прашања заедно со нашите хрватски партнери. Мислам дека членството на Црна Гора би било и во интерес на Хрватска, со цел дополнително да се зајакне стабилноста и просперитетот на земјите од Западен Балкан. Но, многу е важно сите да разберат дека, покрај техничкиот дел од процесот, кој се однесува на усвојување на одредени правни норми на ЕУ… постои и политички дел од овој процес, имено дека на крајот секоја од овие 27 земји-членки мора да крене рака за членство на една од новите членки. Во оваа смисла, секако треба најмногу да работиме на односите со Хрватска, а веројатно и со некои други земји“, кажа Милатовиќ.