Претседателот на Демократската партија (ДС) и пратеник Срѓан Миливојевиќ денеска изјави дека српскиот претседател Александар Вучиќ наредил на специјалните полициски сили да употребат сила против студентите и да ги деблокираат приодите кон Радио телевизија Србија (РТС) на улицата Таковска и во Кошутњак, во ноќта меѓу четвртокот и петокот.
Миливојевиќ за агенцијата Бета изјави дека оваа информација ја добил од сигурни извори од Министерството за внатрешни работи (МВР) и Безбедносно-информативната агенција (БИА), и ги повика сите пратеници од опозицијата да ја поминат наредната ноќ заедно со студентите пред зградата на РТС.
„Вучиќ им нареди на полициските единици итно да ги разбијат студентските блокади. Ги изгуби нервите и се исплаши како мало глувче, а сега, во напад на паника и страв, сака да им се обрати на граѓаните преку РТС. Ги повикувам граѓаните вечерва во што поголем број да бидат присутни на Таковска и Кошутњак, како и да застанат рамо до рамо со студентите“, рече Миливојевиќ.
Тој додаде дека Вучиќ наредил смена на Владимир Орлиќ од позицијата директор на БИА, бидејќи, како што рече, постојано „протекуваат“ информации од агенцијата.
„Вучиќ е незадоволен од протекувањето информации од БИА, особено затоа што знаеме сè за употребата на звучниот топ. Ќе поднесам кривична пријава против МВР бидејќи тој уред е незаконски набавен и употребен. Исто така, ќе поднесам кривична пријава и против неовластеното и неспособно лице кое, спротивно на законите и Уставот, поканило припадници на странска безбедносна служба во Србија“, изјави Миливојевиќ.
Тој потсети дека Првата светска војна започна откако Србија не дозволи на австроунгарските истражители да спроведат истрага за атентатот во Сараево на нејзина територија.
„Странски безбедносни служби можат да бидат повикани во Србија само по налог на суд. Бидејќи руската ФСБ не била повикана од српски суд, туку од неовластено лице, против Александар Вучиќ ќе биде поднесена кривична пријава“, заклучи Миливојевиќ.