Според медиумски извештаи, новиот „мировен план“ што го подготвува американскиот претседател Доналд Трамп предвидува значајни отстапки од страна на Украина. Иако официјалната содржина на планот сè уште не е објавена, проценките се дека тој би значел предавање на речиси сите територии што моментално се под руска окупација, вклучувајќи го и Крим.
За возврат, Украина би добила само мал дел од областа во близина на Харков, слободен транспорт по реката Дон и можност за приклучување кон Европската унија – но не и во НАТО. Дополнително, планот предвидува укинување на сите санкции кон Русија.
Украинскиот претседател Володимир Зеленски реагираше остро, потсетувајќи дека САД ја осудија анексијата на Крим. Трамп, пак, ја нарече неговата изјава „воинствена“ и ја обвини Украина дека ги комплицира преговорите, оценувајќи ја ситуацијата како „ужасна“.
Меѓутоа, според Серхиј Кусан од Украинскиот центар за безбедност и соработка, ваквиот поглед е искривен. Тој вели дека Украина бележи тактички успеси на фронтот, индустријата за оружје расте, а поддршката од европските партнери е сè посилна.
„Нашата ситуација е значително подобра отколку пред една година“, изјави Кусан за Дојче Веле. Тој признава дека руските сили постигнуваат одредени успеси, но без сериозно стратешко значење и со големи човечки загуби. „Тврдењата на Москва дека украинската одбрана е пред колапс се само пропаганда – тие едноставно немаат ресурси за целосна инвазија“, додаде тој.
Хана Шелест од институтот „Призма“ смета дека претставниците на американската администрација, предводени од специјалниот пратеник Стив Виткоф, се под влијание на руската перспектива. „Кремљ верува дека Русија е доволно силна да води долготрајна војна, а Украина е слаба и осамена. Трамп мисли дека му прави услуга на Киев со неговиот план“, вели Шелест.
Во меѓувреме, градоначалникот на Киев, Виталиј Кличко, за Би-Би-Си изјави дека отстапување на дел од територијата, иако нефер, би можело да биде дел од „привремено решение“ за постигнување мир. Тој предупреди дека претседателот Зеленски може да биде принуден на болна одлука поради притисоците од Вашингтон.
Украинските власти, и покрај тешкотиите на теренот, нагласуваат дека капитулацијата не е опција, а одлуките што ги засегаат суверенитетот и територијалниот интегритет не можат да бидат наметнати.