Ул. Гоце Делчев 12, Петрич е адресата околу која се вртат милионите на Заеви и Филипче. Ова е адресата која Венко Филипче сакал да ја сокрие од јавноста кога не ја пријавил својата фирма основана во Бугарија, обвини на денешната прес-конференција Марија Митева, портпарол, пратеник и член на ИК на ВМРО-ДПМНЕ.
Според Митева, претседателот на СДСМ сокрил имот во анкетниот лист, за да не се доведе во врска со Медикал 420 од која исчезнуваше марихуана, подоцна фатена во меѓународна акција.
-Медикал 420 БГ е фирмата во чија поддружница во Битола во 2022 биле пронајдени наркотици во вредност од 800 илјади евра, иако на истата фирма една година претходно и била одземена лиценцата, истакна портпаролката на ВМРО-ДПМНЕ.
Од СДСМ реагираа и побараа, ако имаат докази во ВМРО-ДПМНЕ, да ги процесираат до надлежните органи.
-Тоа што од белиот дворец ја праќаат Митева да зборува за некоја фирма која никогаш не била активна и нема никакви трансакции, кажува колку е очајна оваа пропаганда на лаги од ВМРО-ДПМНЕ. Претседателот Венко Филипче има се пријавено во својот анкетен лист и нема што да се крие од јавноста.
Наместо ВМРО-ДПМНЕ да сее невистини и да креира приказни со кои очајно се обидува да го оцрни претседателот на СДСМ, Венко Филипче, нека седне и нека работи нешто, велат од партијата од „Бихаќка“.