Мицкоски од Загреб: Имаме тешка задача за надминување на предизвиците и обнова која треба да донесе поубав живот на сите граѓани

од Vladimir Zorba

Претседателот на ВМРО-ДПМНЕ, Христијан Мицкоски во рамки на самитот на Европската Народна Партија (ЕНП) во Загреб остварил повеќе билатерални средби. Тој се сретнал со претседателот на Европскиот Совет и иден претседател на Европската Народна Партија Доналд Туск, потпретседателот на Европската комисија за Работни места Јирки Катајнен, Хрватскиот премиер Андреј Пленковиќ и лидерот на албанската опозиција Љуљзим Баша.

Мицкоски на средбата со идниот претседател на ЕНП, Доналд Туск изразил загриженост за состојбите во државава, „недостигот на правда, зависниот и корумпиран правосуден систем, како и растечката сиромаштија“.

– Побарав поддршка за Република Македонија на планот на Европските интеграции. Туск како пријател на нашата земја изрази подготвеност да помогне на патот кон Европската Унија и градење на продлабочено партнерство и соработка со ВМРО-ДПМНЕ како членка на Европската Народна Партија. Идната Влада предводена од ВМРО-ДПМНЕ ќе ги искористи сите потенцијали и пријателства да се одблокира европскиот пат, и да се спроведат реформи кои ќе донесат стандарди, подобар живот и обнова која им е потребна на граѓаните, споделил Мицкоски, цитиран од неговата партија.

Претседателот на ВМРО-ДПМНЕ на средбата со Јирки Катајнен, досегашен евро комесар, потпретседател на Европската комисија за Работни места, раст, инвестиции и компетитивност и поранешен премиер на Финска дискутирал за новите технологии и инвестиции на ЕУ и можностите и перспективите за развој на С.Македонија во оваа сфера.

Мицкоски и пемиерот на Хрватска, Андреј Пленковиќ ги констатирале одличните односи на двете сестрински партии, при што претседателот на ВМРО-ДПМНЕ побарал хрватска поддршка за Европските интеграции на Македонија.

– Очекувам одлична соработка на идната македонска Влада со Владата на Република Хрватска, и реформи кои ќе не стават на брза патека кон ЕУ, истакна Мицкоски.

Пред почетокот на самитот Мицкоски остварил средба и со лидерот на албанската опозиција Љуљзим Баша на која двајцата соговорници размениле искуства, размислувања и погледи за иднината на нашите земји и регионот.

– Пред нас имаме тешка задача за надминување на предизвиците и обнова која треба да донесе поубав живот на сите граѓани, заклучи Мицкоски.

loading...

Слични содржини