Државната Комисија за спречување на корупцијата (ДКСК) отворила предмет против директорот на Финансиската полиција, Арафат Муареми, информираше претседателката на ДКСК, Билјана Ивановска.
Од Управата за финансиска полиција во изјава за „Локално“, велат дека директорот вчера дознал од изјавата на Ивановска дека за него е отоврен предмет и дека веќе има и други предмети.
-Директорот ja охрабрува и поддржува претседателката на ДКСК дека секоја поднесена пријава/иницијатива за него да ја провери до крај, велат од Управата за финансиска полиција.
Ивановска вчера соопшти дека станува збор за пријава, како и секоја друга.
-Има повеќе пријави стигнато за директорот на Управата за финансиска полиција и ДКСК постапува по тие пријави. Некоја од пријавите е поврзана со „Трансмет“. Тоа е всушност предмет кој што Државното правобранителство го има доставено и до ДКСК, истиот предмет. Директорот на Финансиската полиција бил истражител во предметот, во СЈО, во време кога со предметот работеле обвинителите Гаврил Бубевски и Артан Ајро, кажа директорката на ДКСК.
Според неа, за директорот има и други предмети.
-Отворени сме кон медиумите и се трудиме да бидеме транспарентни. Не е коректно да откривам нешто кое што не сме го сработиле до крај, не сме докажале. Се кажуваме на јавна седница. Кога ќе бидат завршени, ќе ги соопштиме, рече Ивановска во емисијата „Топ тема“.