Во врска со изнесените наводи за цензура во Музејот на Град Скопје, од Институцијата информираат дека се работи за проектот Каљари – Скопјe, “Cagliari – Skopje” – кој е плод на размена во областа на културата помеѓу Италија и Македонија.
-Во текот на есента 2022 година беа реализирани две резиденции на уметници, една во Каљари, Сардинија и една во Скопје, каде македонски и италијански млади уметници заеднички твореа уметнички дела, инспирирани од културата и природата на околината во која се наоѓаат резиденциите – во Република Македонија тоа беа градот Скопје и Скопската околија, а во Сардинија, градот Каљари и островот Антиоко.
Резултатите од овие две уметнички работилници беа прикажани во Музејот на Град Скопје во текот на вчерашниот ден. Уметниците од Сардинија ги прикажаа cвоите импресии од Македонија, а скопските уметници своите импресии од Сардинија. За жал, еден од македонските уметници, Зоран Шеќеров, сакаше да вклучи свои дела кои тематски не се поврзани и не се вклопуваат со проектот, бидејќи не се поврзани со неговиот престој во Сардинија.
Но, бидејќи за Музејот од особена важност е стимулирање на критичка уметност го покануваме Зоран Шеќеров да аплицира со овие дела за самостојна изложба. Вратите на Музејот се секогаш отворени за млади и креативни уметници од Македонија со цел промоција на македонската култура, стои во соопштението од Музејот.
Уметникот на својот Фејсбук профил објави дека „28-ми ноември како црн ден за македонската култура и уметност, ден кога се цензурираше уметникот во Македонија“.
-Уметничката инсталација во која уметникот Зоран Шеќеров ја анализира „северна“ е забранета и нема да биде дел од утрешната изложба „А/R Каљари-Скопје“ во Музејот на град Скопје, истакна Шеќеров.