Авганистанските разбојници кои извршиле физички напад и кражба се илегални мигранти кои влегле во земјава од Грција и никако не се поврзани со граѓаните за кои државата обезбеди хуманитарна помош, информираат од МВР.
Оттаму апелираат до медиумите и до граѓаните да ја направат разликата со цел да не се создава омраза кон миротворното население од Авганистан за кое се спроведува меѓународна хуманитарна акција да биде извлечено и спасено од талибанските власти.
Кумановското обвинителство од Судот бара да им биде одреден 30 дневен притвор на 25 и 31 годишните Авганистанци кои со нож му се заканиле на Индиецот и го ограбиле.
Тие се осомничени за кривичното дело разбојништво. Според соопштението на оБвинителството, осомничените го повредиле државјанинот на Индија.
„По ударот жртвата паднала на земја, по што двајцата осомничени му ги врзеле рацете и нозете и сериозно му се заканиле дека ќе го убијат ако не им ги даде сите пари што ги има“, стои во соопштението.
Во него е посочено дека осомничените му украле 440 евра, и продолжиле да го тепаат присилувајќи го Индиецот да бара од неговиот брат да му испрати 2.300 евра преку „Money Gram“ ако сака да биде ослободен.