Популарната сплитска пејачка Данијела Мартиновиќ, која неодамна ја видовме со одличен концерт на прилепскиот „Пиво фест“, овој пат доаѓа во Делчево.
Поточно на 9 август жителите, гостите и учесниците на „Делчевско лето 2019“ ќе пеат и танцуваат на своите омилените песни од репертоарот на Даниела: „Плеши са мном“, „Нека ми не сване“, „То мало љубави“, „Ево мене, „Распашој“, “Једна за љубав“… На прес-конференцијата делчевскиот градоначалник Горан Трајковски ги соопшти имињата и на другите музичари кои ќе настапат пред настапот на сплитската пејачка ѕвезда на 9 август на летната сцена во градскиот парк во Делчево.
– Општината Делчево во соработка со бизнис-секторот годинава организира спектакуларни концерти во рамките на „Делчевско лето 2019“. Ѕвезда на вечерта е хрватската пејачка Данијела Мартиновиќ, чии хитови ги сакаат и млади и постари. Концертите ќе се одржуваат на 9 август кога, освен Мартиновиќ, ќе настапат девојките од „Дикато-бенд“, рок-групата „Троја бенд“ и делчевците „The Jokers“, истакна Трајковски. Традиционално, и ова лето културните збиднувања започнуваат ноќта спроти верскиот празник Св. Пантелејмон, на 8 август, кога на летната сцена на Голак ќе се одржат меѓународните „Голачки фолклорни средби“.
Целта за организацијата на овие концерти е да се даде нов имиџ на градот, со што ќе се раскаже нова приказна за градот Делчево и државата С. Македонија.
– Како дел од она што минатото лето го договаравме со бизнис-секторот, во рамки на бизнис-форумот „Да ја поддржиме приказната за Делчево“, ги реализираме активностите од областа култура и културни настани, бидејќи тие ја даваат душата на градот. Целта и на Општина Делчево и на претставниците од бизнис-секторот е да им овозможиме на нашите граѓани и на граѓаните од регионот, незаборавна вечер и забава и заедно да испишеме нова традиција, истакна Трајковски.
Очекувањата на Трајковски се дека Делчево на 8 и 9 август ќе биде домаќин на илјадници гости од регионот.