Според најновите податоци од Институтот за јавно здравје се намалува бројот и процентот на позитивни на коронавирусот во земјава.
Фото: Борче Поповски
Вкупната бројка Ковид дијагностицирани во нашата земја од почетокот на епидемијата изнесува 13.914, бројката на оздравени пациенти е 10.507, на починати е 578, а во моментов бројот на активни случаи во земјата изнесува 2.829. Во Скопје сè уште се активни 884, Куманово 361, Штип 228, Тетово 180, Кавадарци 90, Гостивар 286, Свети Николе 71, Кичево 86 и други.
На Инфективната клиника вкупно се хоспитализирани 83 пациенти од кои на кислородна поддршка се 50 пациенти, нема на механичка вентилација.
Во болницата во Козле се хоспитализирани 19 возрасни пациенти позитивни на Ковид-19, шест позитивни деца, една мајка и едно дете суспектни на вирусот.
Во ГОБ „8 Септември“ вкупно хоспитализирани се 48 пациенти од кои на респираторна машина се пет пациенти.
Во болницата во Битола се хоспитализирани 14, а во болницата во Штип се хоспитализирани 46 пациенти. На инфективните одделенија во Тетово, Охрид, Велес, Куманово, Прилеп, Гостивар, Струмица и Струга се хоспитализирани 105, позитивни и сомнителни на Ковид-19.
Се намалува бројот на активни случаи по скопските општини: Чаир – 117, Гази Баба – 112, Аеродром – 104, Карпош – 91, Центар – 91, Кисела Вода – 98, Ѓорче Петров – 58, Бутел – 68, Шуто Оризари – 37 и други.
Министерството за здравство вчера информираше дека во изминатите седум дена е намален бројот на новопотврдени и процентот на позитивни на Ковид-19.
Од 17 до 23 август се направени 11.129 тестирања на коронавирусот, а вкупно се регистрирани 839 нови позитивни случаи од 29 градови во државата, што е намалување од 7,0 отсто, во однос на минатата недела. Најголем дел, односно 33,5 отсто се од Скопје. Во овој период, бројот на новопотврдени случаи е под 20 лица, во 16 града во земјата.
– Процентот на позитивни од тестирани изнесува 7.5 отсто, што претставува намалување од 0,3 отсто во однос на претходната недела. Овој индикатор и натаму покажува тренд на намалување, во однос на претходните недели кога истиот се движи од 10 отсто, 9.4 отсто, 8.6 отсто и 7.8 отсто, соопшти вчера Министерствотот за здравство.
Според извештајот на ИЈЗ, пријавени се 19 смртни случаи од шест градови или два повеќе во однос на претходната недела и сите се на возраст над 60 години. Од нив, 16 биле хоспитализирани, а три лица починале во вонболнички услови. Коморбидитети се регистрирани кај 16 починати лица.