Навални им се заблагодари на руските пилоти и лекарите за брзата реакција

од Vladimir Zorba

Рускиот опозициски лидер Алексеј Навални, кој се опоравува од последиците од труењето во Германија, им се заблагодари на руските пилоти и лекарите за брзата реакција кога му се слоши во текот на летот од Сибир кон Москва.

Навални, на кого му се слоши на 20 август во авион, по што беше во кома скоро три недели, напиша на Инстаграм дека пилотите „брзо слетале во Омск“ и дека лекарите на аеродромот „му инјектирале доза атропин“, поради „труење со отровна материја“.

„Ви благодарам, непознати пријатели со добро срце. Вие сте добри луѓе“, напиша 44-годишниот блогер, со слика на која тој ја прегрнува својата сопруга Јулија.

Откако помина 48 часа во болница во Омск, чии лекари рекоа дека не откриле траги од труење во неговото тело, Навални беше префрлен во берлинската болница „Шарита“.

Германски експерти за хемиско оружје објавија дека утврдиле дека Навални е отруен со нервниот агенс „новичок“, развиен во ерата на Советскиот Сојуз и дека наодите се потврдени од лабораториите во Франција и Шведска.

Навални, најголемиот противник на Русија, Владимир Путин, беше пуштен од болница оваа недела. Неговиот тим за труењето го обвинува Кремљ, чии претставници ги негираат обвинувањата.

Западните влади бараат од Русија да започне истрага за труењето на Навални, на што Москва се спротивставува, тврдејќи дека во телото на Навални нема траги од отровни материи.

Москва бара од Германија, Франција и Шведска да ги споделат своите наоди.

Навални остана во Германија на рехабилитација, што може да трае со недели, а неговите соработници велат дека планира да се врати во Русија во одреден момент.

loading...

Слични содржини